Ish-kryeministri Sali Berisha ka mbajtur “foltoren” e radhës në Dibër. Ai ka falënderuar demokratët e Dibrës për mbështetjen ndaj PD, ndërsa ka thënë se regjimi i Edi Ramës i zhyti shqiptarët në varfëri dhe mjerim.
“Kam ardhur sot këtu me një kënaqësi të veçantë për të falenderuar demokratët e Dibrës për mbështetjen ndaj Partisë Demokratike. Po ashtu edhe delegadët e Kuvendit Kombëtar të cilët kanë firmosur tashmë mbi 2/3 vendimin e tyre për të mbledhur Kuvendin Kombëtar Ky Kuvend duhet të mblidhet në përgjigje të një regjimi të Edi Ramës. Ky regjim në këto 8 vite zhbëri një shumicë të madhe dhe shqiptarët i shyti në varfëri dhe mjerim”, tha Berisha.
Ish-kreu i PD deklaroi ndër të tjera se Shqipëria ka numrin më të lartë të vdekjeve nga pandemia në Europë. Ai tha se kjo ka ndodhur për shkak të abuzimit të qeverisë dhe vjedhjes që qeveria bën edhe mbi të vdekur e të sëmurë.
“Paratë e buxhetit i vjedhin dhe vetëm i vjedhin. Pandemia ishte e përbotshme, por ne numërojmë 16.800 jetë të humbura gjatë saj, numërojmë më shumë se çdo vend tjetër në Europë, dhe jemi një nga 3-4 vendet me vdekshmërinë më të lartë në botë nga Covid. Po pse ndodh kjo? Sepse keta me tenderat e shëndetësisë vjedhin dhe vetëm vjedhin, mbi të vdekur e të sëmurë”, ka thënë Berisha.
