Mjaftuan vetëm pak ditë infektim me COVID-19, që kreu i Kishës Ortodokse Serbe, patriarku Irinej, tashmë i plakur, të mos ja dilte dhe të ngjitej pranë fronit të Krijuesit.
Lajmi bëhet i ditur nga mediat serbe, teksa dhe presidenti serb Aleksandar Vuçiç, ka shkruar një mesazh ngushëllimi në Instagram, duke njoftuar vdekjen e patriarkut.
Irinej, i cili kishte një influencë të madhe mbi serbët, nuk mundi të mbijetonte pas prekjes nga koronavirusi më 4 nëntor dhe u nda nga jeta në moshën 90-vjeçare teksa ndodhej në një spital ushtarak në Beograd.
Më 1 nëntor, kreu i Kishës Ortodokse Serbe, Irinej, udhëhoqi funeralin dhe liturgjinë para varrimit të Metropolitit Amfilohije të Malit të Zi, e cila u ndoq nga mijëra besimtarë. Metropoliti Amfilohije ndërroi jetë më 30 tetor për shkak të ndërlikimeve të shkaktuara po nga koronavirusi.
Në varrim, ku ishte i ekspozuar një arkivol i hapur me trupin e mitropolitit, priftërinjtë, shumica e besimtarëve, si dhe disa politikanë, nuk vunë maska dhe as nuk respektuan distancën fizike.
Trupi Kombëtar i Koordinimit për Sëmundjet Infektive (NCT) i Malit të Zi, dënoi me forcë “shkeljen drastike të masave kundër pandemisë”.
Irinej u zgjodh në postin më të lartë në Kishën Ortodokse Serbe, në janar të vitit 2010 dhe shpesh është përmendur edhe për deklaratat e tij kundër shqiptarëve dhe shtetit të Kosovës.
/GazetaReforma.com/
