Sot shënohet dita e dytë e protestës para kryeministrisë. Në ditën e dytë të protestës kanë filluar të mblidhen qytetarët përballë Kryeministrisë duke i kërkuar qeverisë shqiptare që të reagojë duke ulur çmimin e naftës dhe shportës ushqimore.
Gjatë një prononcimi për mikrofonin e “Fax News”, një qytetar ndihet i detyruar të dalë në protestë pasi jeta është e papërballueshme me çmimet që kanë shkuar në stratosferë.
“Jemi këtu për kushtet për çmimet për jetesën është e papërballueshme. Jeta është shumë e vështirë është shtrenjtuar jeta. Unë 10 mijë lek marr gjithë ditën në punë. Çfarë do të bëjmë më parë. Edhe kryeministri ta shikojë. Çmimet e shportës janë shumë të shtrenjta, për këto kemi ardhur s’kemi ardhur për gjëra të tjera”, u shpreh qytetari.
Gjithashtu bie në sy që gjatë protestës së sotme ka përforcime të forcave të policisë për shkak të një përshkallëzimi të mundshëm. Ditën e djeshme, qytetarët bllokuan rrugën duke paralizuar lëvizjen e automjeteve.
Sot mesa duket në ditën e dytë sensibilizimi është edhe më i madh kjo pasi protesta shtrihet në qytete të ndryshme të vendit, Mirditë, Berat, Korccë, Përrenjas, Lushnje.
Më pas, protestuesit dolën në rrugët kryesore të Tiranës, duke bllokuar qarkullimin e mjeteve. Për më shumë se tre orë i gjithë qarkullimi i automjeteve në kryeqyteti u bllokua, ndërsa me protestuesit u solidarizuan edhe drejtuesit e mjeteve.
