Kriza politike në Kosovë po thellohet teksa për herë të 20-të radhazi ka dështuar përpjekja për konstituimin e Kuvendit të ri, ndërsa seanca e radhës është thirrur për më 25 maj.
Megjithë presionin e ndërkombëtarëve, përfshirë shefen e diplomacisë së BE-së, Kaja Kallas, si dhe thirrjet e shoqërisë civile për zgjidhje institucionale, partitë politike në Prishtinë vijojnë të mos bien dakord për zgjedhjen e kryetarit të Kuvendit.
Lëvizja Vetëvendosje mbetet e palëkundur në qëndrimin e saj për të kandiduar Albulena Haxhiun në krye të legjislativit, por PDK dhe AAK e kanë refuzuar hapur këtë propozim, duke e cilësuar si nxitës përçarjeje. Edhe LDK ka bërë të qartë se nuk do të mbështesë asnjë emër të dalë nga radhët e LVV-së.
Tensionet janë përshkallëzuar më tej pasi opozita ka kundërshtuar zhvillimin e votimit me votë të fshehtë, duke e çuar çështjen në Gjykatën Kushtetuese të Kosovës dhe duke kërkuar pezullimin e seancave derisa të ketë një vendim të prerë.
Ndërkohë, për herë të 12-të nuk ka mundur të krijohet as komisioni ad-hoc që do të mbikëqyrte procesin e votimit për kryeparlamentarin, duke lënë vendin në një ngërç institucional të paprecedentë.
