Tensionet vijojnë të shoqërojnë seancën e sotme plenare, pasi deputetët opozitarë të pranishëm kërkojnë futjen e kolegëve të tyre demokratë në Kuvend.
Përveç tensioneve jashtë sallës së Kuvendit mes punonjësve të gardës dhe deputetëve demokratë, të cilët nuk u lejuan të marrin pjesë në seancën e sotme parlamentare, përplasje ka pasur edhe brenda sallës.
Deputetja e PD-së Albana Vokshi në një prononcim për mediat jashtë sallës së Kuvendit është shprehur se deputetët janë dhunuar fizikisht.
Vokshi thekson se ndalimi i deputetëve që nuk janë të përjashtuar ka qenë i qëllimshëm dhe se Kryetarja e Kuvendit ka dhënë urdhër Gardës pa nisur akoma seanca plenare e ditës së sotme.
Deputetja e opozitës shtoi se kjo gjë nuk do t’i ndalojë dhe se do të vazhdojnë mosbindjen civile që sipas saj ka tmerruar maxhorancën.
