Vijojnë temperaturat mbi 40 gradë në disa zona, sinoptikania: Do të kemi forcim të erës

Vala e të nxehtit në vendin tonë është rikthyer sërish, sinoptikania paralmëron se i nxehti do të vijojë deri të mërkurën, ku priten rrebeshe shiu në zonat malore. Ajo ka theksuar se Shqipëria është në periferi të valës së të nxehtit afrikan, por prapë është e ndjeshme në disa zona. Porja ka thënë se temperaturat e larta pritet që të na shoqërojnë në 15 ditëshin e parë të gushtit.
Sinoptikania, Lajda Porja e ftuar në “News 24”, u shpreh se problemi kryesorë përgjatë kësaj jave do të jetë era e cila do të përforcohet duke filluar nga pasditja e sotme. Përforcimi i erës në vendin tonë do të sjellë edhe avancimin e flakëve, të cilat në disa zona rrezikojnë të përfshijnë edhe zonat e banuara.
“Shqipëria është krejtësisht në periferi të valës së të nxehtit, megjithatë është e ndjeshme. Ka pasur që ditën e djeshme një rritje temperaturash, deri në 38 gradë. Parashikohet që sot, nesër e deri të mërkurën, moti të jetë i nxehtë, duke bërë që të kemi temperatura të larta në gjithë zonat e ulëta. Temperatura të larta priten në Elbasan, Berat e zona të caktuara, si Ura Vajgurore, Gjirokastër, ku do të kemi sërish deri në 40 gradë ose edhe më lart.
Pritet që temperaturat e larta të na shoqërojnë në 15 ditëshin e parë të gushtit, ku vlerat do të jenë nga 36 deri në 39 gradë, ndërsa mbi 40 do të jenë vetëm në zona të caktuara. Dita e mërkurë pritet të sjellë rrebeshe shiu, që do të freskojë pak motin. Ditën e enjte do të kemi shi edhe në zonat jugore. Problematike këtë javë do të jetë edhe era. Që nga dita e sotme, në pjesën e dytë të ditës, e deri të premten, do të kemi forcimi të erës”, tha sinoptikania Lajda Porja.