Agjencia e Mbrojtjes Civile në Gaza raportoi se të paktën 52 persona kanë humbur jetën si pasojë e bombardimeve të përshkallëzuara izraelite në zonë.
Zëdhënësi Mahmoud Bassal deklaroi për AFP se sulmet ajrore kanë vazhduar pa ndërprerje nga mesnata dhe gjatë orëve të para të mëngjesit, ndërsa forcat izraelite po zgjeronin operacionet e tyre tokësore.
Kryeministri izraelit Benjamin Netanyahu, në një video të postuar në rrjetin social X, bëri me dije se Izraeli synon të marrë kontrollin e plotë mbi Rripin e Gazës. Ai theksoi se luftimet janë intensive dhe nuk do të ketë tërheqje derisa të arrihet objektivi i plotë.
Netanyahu gjithashtu njoftoi për krijimin e qendrave humanitare nën kontroll izraelit, ku do të shpërndahet ndihma për civilët, duke shmangur kështu shpërndarjen e ndihmave tek grupet e armatosura.
Përveç kësaj, Netanyahu sqaroi se Izraeli ka kufizuar ndihmën humanitare në fillim të konfliktit për shkak të keqpërdorimit nga Hamasi.
Megjithatë, në bashkëpunim me Shtetet e Bashkuara, tashmë është miratuar një sistem i ri shpërndarjeje, që do të sigurojë ndihmën vetëm për civilët, duke parandaluar përfitimin e Hamasit nga këto burime.
Qendrat e para humanitare pritet të hapen në ditët në vijim, me synimin për të krijuar një zonë të sigurt ku civilët mund të marrin ndihmën e nevojshme.
