Kryeministri i Shqipërisë, Edi Rama, duket se ende nuk është i kënaqur me peshën e tij trupore. Pasi ka hequr disa kile, që vihen re qartësisht, Rama ende vijon të bëjë reklame për konsumim të shëndetshëm, sa na duket se është kthyer në rolin e një dietologu. Teksa zhvillon fushatën e tij elektorale në Berat, ka ndalur për t’u freskuar pak duke konsumuar lëngje, në një prej bizneseve të qytetit.
Biseda e tij me kamarierin Reno, tregon një anë tjetër të kryeministrit të vendit, që duket se fushatën e tij elektorale, nuk po e përdor vetëm për të fituar mbështetës më 25 prill, por dhe për të reklamuar bizneset e tij të preferuara.
Biseda mes Renos (kamarierit) dhe Edi Ramës:
Reno: Kemi ujë detoks, ginger, limon.
Rama: Trego ujin mos e mbaj për vete.
Reno: Lëng portokalli të freskët.
Rama: Portokalle Berati janë këto?
Reno: Po, sigurisht të rritura me diell Berati.
Rama: Aaaa diell Berati.
Reno: Këtu kemi dhe komposte nga malli i Tomorit.
Rama: Ja ky është Reno, legjenda e shërbimit në Berat. Ejani tek Reno dhe kënaquni.
Duket se Rama po i bashkohet trendit më të fundit të rrjeteve sociale, duke reklamuar personazhe të ndryshëm. E si për të mos mjaftuar kjo, kryeministri i vendit nuk ngurron asnjëherë të tregojë drekat që konsumon në qytetet e ndryshme, ku nga varka me peshkatarët ku konsumoi karkaleca, tashmë ka kaluar tek uji me ginger i Renos.
