Largimi i sponsorave, tani po kthehet në modë në “Euro2020″… Pasi ylli i Portugalisë, Cristiano Ronaldo, largoi nga tavolina e konferencës për shtyp shishet e “Coca Cola”, një veprim të ngjashëm e ka bërë Paul Pogba, mesfushori i Francës pas fitores me Gjermaninë.
I zgjedhur “njeriu i ndeshjes” pas fitores kundër “Pancerave”, ai largoi një shishe birre “Heineken”, për ironi të fatit kompani që e sponsorizon këtë çmim. Shumë ironike është në fakt e gjitha kjo, pasi burimi i milionave që ata marrin janë sponsorët.
Në të shkuarën ka pasur edhe episode të tjera me largimin e birrave, në një rast protagonist ishte Shkodran Mustafi. Kjo pasi këta futbollistë, janë muslimanë dhe nuk duan të kenë alkool pranë tyre.
Paul Pogba është praktikant i fesë myslimane dhe tifozët vënë në dukje se organizatorët kanë treguar mungesë respekti, duke vendosur një shishe birre para tij. “Të vendosësh një pije alkoolike para një myslimani është mungesë respekti. Nuk mund ta fajësoni Pogban,” shkruante një prej tifozëve në “Twitter”.
“Krejt e kuptueshme që si mysliman që është, Paul Pogba nuk do të dëshironte të shihej duke promovuar birrë”, shkruan në tjetër tifoz. Heineken, një nga sponsorët zyrtarë të Kampionatit Europian, nuk ka komentuar.
https://twitter.com/StarTimesClub/status/1405057554263154688
