Ashtu si shumë prona publike të dhëna me PPP nga qeveria e “Rilindjes” edhe hapësirat e brendshme të QSUT-së nuk i kanë shpëtuar kësaj “kasapane”.
Koncesionari që administrim hapësirat e përbashkëta që nga lulishte janë kthyer në parkime me pagesë, ua ka futur “këmbët në një këpucë” edhe mjekëve.
Këta të fundit shpesh janë revoltuar me këtë shërbim, ku edhe konsiderohen si “heronj” që përballen çdo ditë me COVID-19, nuk lejohet të parkojnë pranë punës së tyre pa paguar si qytetarët e tjerë.
Një protestë të tillë e ka bërë sot për mediat edhe mjekja e njohur dermatologe pranë Qendrës Universitare “Nënë Tereza”, Monika Fida.
Sipas saj, koncesionari që merr përfitimin për menaxhimin e hyrjes së makinave brenda dhe jashtë kampusit, nuk lejon as mjekët që të parkojnë, nëse nuk paguajnë.
Ajo ka publikuar edhe komunikimin me nëndrejtorin e QSUT-së, teksa shpreh revoltën, sesi edhe bluzat e bardha, nuk lejohet të parkojnë megjithëse sipërfaqja e oborrit të QSUT është e gjitha e lirë.
“Mirëmëngjes, të lutem shumë- Na krijoni minimumin e kushtit të vimë e të parkojmë si njerëz, pas infektivit është bosh, vi për qendrën e konsultave sot dhe për në Fakultet. Të paktën hapeni për personel pas infektivit”,- është teksti i mesazhit që mjekja i dërgon nëndrejtorit të QSUT.
Video-denoncimi i plotë i mjekes Monika Fida në Facebook:
“Atëherë po flas live nga QSUT, jam mjeke konsulente pranë shërbimit të Dermatologjisë, pranë konsultave të Dermatologjisë, duhet të trajtojmë mjekët sot. Shiheni është kohë me shi, po flas se sot shiheni bosh komplet sipërfaqja. Atje do të jap mësim unë sot tek studentët, kjo është sipërfaqja bosh këtu Kjo sipërfaqe nuk lejohet që të përdoret nga mjekët që sot do të japin këtu shërbim.
Koncesionari i parkimit ka bllokuar gjithë vendet, ndërsa ne bluzat e bardha që deri dje ishim heronjtë, nuk lejohemi që të përdorim ambientin këtu. Kjo është gjoba që unë kam marrë, shiheni. Pas komunikimit me nëndrejtorin e QSUT, nuk lejohemi të parkojmë, se s’ka vend QSUT për mjekët, se s’ka vend për të ofruar shërbim”,-thotë Fida.
Kjo nuk është hera e parë që mjekët dhe infermierët denoncojnë zhvatjen, që sipas tyre, po iu bëhet nga koncesionari i QSUT-së.
Ata hyjnë çdo ditë për të shkuar në punë në ambientet e kampusit, por janë të detyruar të paguajnë si të gjithë qytetarët e tjerë.
Prej dhjetorit 2018, qeveria ia ka ngarkuar menaxhimin e parkingut në QSUT Fondit Shqiptar të Zhvillimit.
/GazetaReforma.com/
