Kreu i Partisë Demokratike, Lulzim Basha ndodhet ditën e sotme në Shkodër ku është pritur me entuziazëm të madh nga qytetarët. Njerëzit kanë mbushur rrugën, ndërsa në duar mbanin flamuj të PD dhe thërrisnin “Rama ik”. Kryedemokrati doli nga makina për t’i përshëndetur dhe i falenderoi për pritjen duke i kërkuar të ruajnë distancën.
Ditën e djeshme ai ishte në Kamëz, ku sërish u prit me ovacione nga qytetarët të cilët janë grumbulluar në kundërshti me rregullat e pandemisë për ta pritur.
“Ju falënderoj nga zemra për këtë pritje. I kam parë lotët në sytë e nënave dhe motrave tuaja, kam parë dhimbjet tuaja. Më 25 prill, Shqipëria fiton. Rama ik. Bashkë për ndryshimin, Shqipëria fiton, Kamza fiton.! Mbani distancën. Me 25 prill të gjithë te kutitë e votimit.”, ka thënë Basha.
Ndërkohë, pak ditë më parë ai ishte në Kavajë, ku qytetarë të shumtë u mblodhën për ta pritur, ndërsa kryedemokrati hipi mbi kofanon e makinës për t’i përshëndetur.
“Ça bëhet këtu! Zëri i Kavajës ka qenë zëri i ndryshimit. Një porosi ju lutem mbajmë pak distancë se jemi afër. Ju falënderoj nga zemra për këtë pritje. Bashkë për ndryshimin, Shqipëria fiton!”, tha kreu i PD-së në Kavajë.
Edhe në Elbasan Basha u prit me entuziazëm, ku nuk munguan as përplasjet mes militantëve të Partisë Socialiste dhe atyre të PD.
