Vetting-u duket se po i merr radhë të gjithë gjyqtarët e korruptuar, ku pas kreut të Gjykatës së Sarandës, radha i erdhi një tjetër drejtuesi.
Ditën e sotme është bërë i ditur lajmi se kreu i Gjykatës së Shkodrës është shkarkuar nga komisioni I Vetting-ut, i përbërë nga Fildes Shuli, Etleda Çiftja dhe Roland Ilia.
Sipas raportit të ILDKPKI-së, kreu I gjykatës, Arben Zefi, del se ka realizuar deklarim të saktë, mirëpo në deklarata e Vetting-ut nuk ndodhet vlera e mjeteve të disponuara prej tij si dhe subjekti nuk ka deklaruar dhënien e shumës prej 50 mijë eurosh një shoqërie dhe përfitimin e pasurive të paluajtshme prej saj.
KPK konstaton se subjekti ka deklarim të pamjaftueshëm lidhur me shoqërinë tregtare SMO. Ai ka qenë në konflikt interesi, pasi ka shqyrtuar një padi të shoqërisë SMO teksa ishte në marrëdhënie kontraktore me të. KPK ka verifikuar gjithashtu se subjekti Arben Zefi ka kontakte të papërshtatshme dhe është përfshirë në afera korruptive.
Edhe raporti i DSIK-së thotë se disponohen të dhënat ku subjekti përfshihet në korrupsion pasiv si gjyqtar në disa procese në Shkodër, si dhe ka kontakte me persona të papërshtatshëm dhe vlerëson në fund se ai është i papërshtatshëm për sistemin.
