Më herët mbrëmjen e sotme u raportua se një 19-vjeçar, i identifikuar si Henri Gjoka, nga Laçi ka mbetur i plagosur me armë zjarri.
Fillimisht u tha se i riu ishte plagosur nga disa persona që kanë qëlluar me armë nga një automjet tip “Mercedez Benz” pranë banesës së tij.
Mirëpo së fundmi, Policia e Shtetit me anë të një njoftimi për mediat bën me dije se 19-vjeçari ishte vetëplagosur.
Sipas njoftimit, i riu ishte vetëplagosur në banesën e tij dhe ishte dërguar nga familjarët e tij drejt spitalit të Traumës në Tiranë, teksa nuk janë bërë me dije rrethanat në të cilat ndodhi ngjarja.
19-vjeçari, aktualisht ndodhet tek Trauma në Tiranë ku edhe po merr kujdesin e nevojshëm shëndetësor nga mjekët.
Ndërkohë Policia dhe grupi hetimor kanë mbërritur me urgjencë në vendngjarje për të mësuar shkaqet e plota të ngjarjes.
Njoftimi i plotë
“Kurbin/Informacion paraprak/ Më datë 23.04.2020, në Kurbin, në banesën e tij, dyshohet të jetë vetplagosur me armë zjarri shtetasi H.Gj.,19 vjeç, i cili është transportuar në spitalin e Traumës Tiranë. Në drejtim të vendngjarjes kanë shkuar forcat e Policisë dhe Grupi hetimor, paraprakisht nga informacionet e marra në vendngjarje pasi familjarët janë nisur në drejtim të Tiranës për të transportuar 19 vjeçarin drejt spitalit, dyshohet se është vetëplagosur me armë zjarri.Grupi hetimor nën drejtimin e Prokurorisë po punon për sqarimin e rrethanave të ngjarjes.”
