Sekretari për zgjedhjet i PD-së, Ivi Kaso, tha se nëse Reforma në Drejtësi do të funksiononte siç duhet, atëherë do të ishin vënë në pranga politikanë dhe zyrtarë të lartë për korrupsion.
“Dita kur një zyrtar i lartë ose politikan do të vihej në pranga për vepra korruptive, nuk do të ishte përfundimi me sukses i reformës në drejtësi, por vetëm dita e parë e funksionimit normal të saj”, u shpreh fillimisht Kaso.
Ivi Kaso tha gjithashtu se për shkak të përdorimit të të gjithë instrumenteve të pushtetit nga ana e qeverisë aktuale, sistemi i drejtësisë duhet të jetë nën lupën e shqyrtimit të drejtësisë së re dhe kjo gjë, sipas z. Kaso do të ndodhë vetëm pas zgjedhjeve të 25 prillit, kur edhe do të fillojnë të gjykohen penalisht zyrtarët e lartë.
“I kanë bërë rregullat siç kanë dashur vetë, kanë përzgjedhur kë kanë dashur vetë. Gjykimi penal do të ndodhë vetëm kur drejtësia të çlirohet nga influenca politike dhe kjo ka për të ndodhur vetëm pas zgjedhjeve të 25 prillit”, përfundoi Kaso.
Socialisti Ulsi Manja, nga ana tjetër, i është përgjigjur qytetarëve duke thënë se korrupsioni për të është vepër penale, pavarësisht nga niveli i zyrtarëve që e konsumon këtë vepër penale. “SPAK është konceptuar si strukturë e posaçme për të hetuar korrupsionin në radhët e zyrtareve të lartë, byroja kombëtare e hetimit pritet të bëhet funksionale dhe besoj se në lëndën dhe në rrjetat e SPAK do të kemi edhe politikanë që kanë përlyer duart me pasuritë publike dhe lekët e qytetarëve shqiptarë”.
