Turizmi është padyshim një nga sektorët më të goditur nga pandemia, e sidomos në vendin tonë, ku ekonomia mbështetet tek ky sektor.
Pavarësisht se vendi po shkon drejt hapjes, ende nuk ka një plan se çfarë do ndodhë me turizmin këtë verë, ndonëse hera-herës është thënë se do ketë vetëm turizëm lokal.
Mbrëmjen e sotme, kryeministri Edi Rama ka folur lidhur me masat që do të merren për zhvillimin e turizmit në këtë kohë pandemie, duke deklaruar se nuk është dakord për një plan me masa dhe protokolle të komplikuara.
Në një lidhje me Skype për “Opinion”, kreu i qeverisë tha se kjo verë do të risjellë plazhet publike, pasi çadrat do të jenë vetëm në pjesën e hoteleve për klientët e tyre, kurse pjesa tjetër sipas tij, do t’i rikthehet popullit.
Ky vendim i qeverisë vjen disa ditë, pasi në media kanë qarkulluar afera të ndryshme lidhur me çmimet e shezlongëve.
“Nuk do të lejojmë më asnjë kontratë private për shezlongë dhe çadra, përveç hoteleve. Hotelet kanë turistë, kanë vizitorë, ata mund të vendosin kontratat e tyre. Ndërkohë plazhet e tjera do të jenë plazhe publike dhe qytetarët do të bjnë plazh siç bënim ne dikur kur ishim të vegjël, që shezlone nuk kishte dhe akomodoheshim me ato mjete rrethanore. Plazhet do të jenë publike. Nuk do të ketë më njerëz që dalin me hunj apo dhëmbë të prishur, që i thonë atyre djemve dhe vajzave: paguaj 5 euro të hysh këtej e të dalësh andej, 7 euro peshqiri, dy euro jastëku. Plazhet do t’i kenë shqiptarët”, tha Rama.
Sakaq, kryeministri Rama tha se shqiptarët duhet t’i harrojnë pushimet jashtë vendit, pasi koha në të cilën ndodhemi nuk e mundëson diçka të tillë, sepse rrit rrezikun e infektimit.
Më tej, ai shtoi se kjo nuk vlen vetëm për vendin tonë, por edhe për vendet e tjera.
Pra, deri tani kemi mësuar se pushimet këtë verë do i kalojmë brenda Shqipërisë, në plazhe publike dhe pa protokolle të forta sigurie, teksa mbetemi ende në pritje të një plani të mirëmenduar.
https://www.facebook.com/edirama.al/videos/1371344326586791/
