Komisioni i Venecias ka publikuar sot opinionin final, për presidentin, Ilir Meta, pas kërkesës së Kuvendit të Shqipërisë.
Në opinion thuhet se Metës i duhej një bazë ligjore për të anuluar zgjedhjet e 30 qershorit.
“Në përgjigje të kërkesës për një mendim nga Kryetari i Kuvendit të Shqipërisë, Komisioni i Venecias arrin në përfundimin se, në mungesë të një dispozite ligjore për këtë çështje, Presidenti mund të anulojë zgjedhjet për organet e qeverisjes vendore në një situatë e cila plotëson kriteret për marrjen e masave emergjente. Edhe atëherë Presidentit i duhet një bazë ligjore specifike – ad-hoc – për të shtyrë zgjedhjet”, thuhet në opinion.
Më tej në konkluzionet e ‘Venecias’, thuhet se anulimi i zgjedhjeve është i mundur vetëm në rastet që plotësojnë kërkesën për shpalljen e gjendjes së jashtëzakonshme, që për këtë rast nuk u ndoqën rregullat e Kushtetutës.
Gjithashtu Komisioni i Venecias është shprehur kundër bojkotit të opozitës, duke thënë se nuk mund të bëhen levë për të parandaluar zgjedhjet.
Përsa i përket shkarkimit të Metës, në opinion përcaktohet, se të drejtën për të përcaktuar nëse presidenti ka shkelur Kushtetutën, e ka Kuvendi dhe Gjykata Kushtetuese.
“Edhe nëse janë konstatuar shkelje, kjo nuk mund të çojë në fajësimin domosdoshmërisht të presidentit.”, thuhet më tej në konkluzionet përfundimtare.
DISA KONKLUZIONE NGA OPINIONI FINAL I “VENECIAS”
-Anulimi i zgjedhjeve është i mundur vetëm në situata që plotësojnë kërkesën për shpalljen e gjendjes së jashtëzakonshme. Sidoqoftë, rregullat e zbatueshme kushtetuese për situata emergjente nuk u ndoqën në këtë rast. As nuk kishte një konsensus politik, i cili do të lejonte krijimin e një baze ligjore ad-hoc.
-Mungesa e një baze ligjore dhe disponueshmëria e alternativave (shtyrja e zgjedhjeve sipas masave emergjente sipas nenit 170 të Kushtetutës ose rifillimi i dialogut politik pas zgjedhjeve) e bëjnë ndërhyrjen në të drejtat elektorale jo proporcionale.
-Bojkoti zgjedhor nga partitë politike, edhe nëse ato përfaqësojnë një pjesë të rëndësishme të elektoratit, nuk mund të parandalojë që të bëhen zgjedhje të rregullta. Përndryshe, këto parti do të merrnin levën për të parandaluar plotësisht çdo zgjedhje.
-Do të jetë Kuvendi dhe në fund Gjykata Kushtetuese që do të përcaktojnë nëse anulimi, e më pas shtyrja e zgjedhjeve lokale do të thotë një shkelje e Kushtetutës dhe nëse shkelja është e një karakteri serioz, i cili do të lejonte hetimin e Presidentit.
-Përfundimisht, edhe nëse u konstatuan disa shkelje, kjo nuk duhet domosdoshmërisht të cojë në fajësimin e Presidentit, duke marrë parasysh parasysh fuqinë e seancës plenare të Kuvendit për të marrë parasysh qëllimet kushtetuese, siç janë kontrollet dhe ekuilibrat.
Raportin final mund ta lexoni këtu ->download
