Presidenti i SHBA Joe Biden ka thënë se dënimi i një ish-oficeri policie për vrasjen e George Floyd “mund të jetë një hap gjigant përpara në marshimin drejt drejtësisë në Amerikë”. Por ai paralajmëroi: “Ne nuk mund të ndalemi këtu”.
Oficeri Derek Chauvin u filmua duke u gjunjëzuar në qafën e afro-amerikanit Floyd për më shumë se nëntë minuta, duke shkaktuar protesta masive kundër racizmit. Ai u shpall fajtor të martën për vrasje të shkallës së dytë, vrasje të shkallës së tretë dhe vrasje pa dashje. Dënimi ka të ngjarë të ndodhë brenda dy muajsh, dhe Chauvin mund të kalojë dekada në burg. Ai pritet të apelojë kundër vendimit.
Në një telefonatë me familjen e Z. Floyd pas shpalljes së vendimit, presidenti u dëgjua duke thënë: “Të paktën tani ka një farë drejtësie”. Në vërejtjet televizive pak më vonë, Z. Biden tha se një vendim i tillë ishte “shumë i rrallë”.
“Ne nuk mund ta lëmë këtë moment ose të shohim larg duke menduar se puna jonë është bërë. Ne duhet ta shikojmë atë ashtu siç pamë për ato nëntë minuta dhe 29 sekonda,” tha ai.
Zy/presidentja Kamala Harris u bëri thirrje ligjvënësve të kalojnë projekt-ligjin George Floyd që synon reformimin e policisë në SH.B.A.
“Ky projektligj është pjesë e trashëgimisë së George Floyd. Kjo punë është vonuar shumë,” tha ajo.
