Ish-drejtori i ISHP-së, Besnik Jaka ka folur për situatën e Covid në vendin tonë dhe për vendimin e qeverisë që do të hyjë në fuqi nga e enjtja për mbajtjen e maskës dhe në ambientet e hapura. Në emisionin “Me Xhaxhiun” në Fax News, Jaka u shpreh se është e këshillueshme maska për individët vulnerabël, por në realitet nuk imunizon asnjë individ që të mos preket nga Covid-19.
“Maska është një element, por duhet të shikojmë të gjithë sjelljen nga fillimi i pandemisë deri tek e shtuna pasdite vendimin për mbajtjen masive të maskës. Maska është mbrojtje, por nuk imunizon asnjë individ të mos preket nga Sars-Cov-2. Sigurisht është e këshillueshme në cdo kohë për individët vulnerabël dhe që kanë kapacitet të ulët pulmonare apo bronkiale apo kanë sëmundje të tjera të mbivendosura sepse maska në vetvete të bën vetëm mirë.
Ne kemi bërë shfaqje me tanke, u bë një karantinim. Karantimi u shpik që në kohët e lashta që qeveritë apo shoqëria dhe familja për tu përballur me viruse, qofshin edhe terapi popullore. Në këto kohë kemi paaftësi ulëritëse në drejtim të menaxhimit por kjo nuk mbulohet me presion ndaj qytetarëve, me fajësi ndaj qytetarëve sepse thelbi në të gjithë botën është testim gjurmim trajtim”, tha Jaka.
Ndër të tjera, theksoi se pavarësisht kërkesave që të shtohen testimet, ISHP e ka kapacitetin deri në 500 dhe nuk mund të bëjë më shumë. “Për të qenë i sinqertë, di edhe kapacitetet e institucioneve shëndetësore. Jemi në kapacitetin maksimal që në Shqipëri bëhen tampone në laboratore shtetërore. ISHP kapacitetin e plotë e ka me 500 tampone dhe kaq bën”, tha Jaka.
/GazetaReforma.com/
