Gjykata ka shpallur fajtore për manipulimin e votave vetëm përfaqësuesen e PDIU-së, ndërsa anëtarët e PD, PS dhe LSI u shpallën të pafajshëm. Ata ia hodhën fajin koleges që kishte përpiluar procesverbalet. Nga ky veprim, PDIU-së i ishin shtuar 20 vota në kutitë e kontestuara.
Tre vjet pas përfundimit të zgjedhjeve Gjykata e Kavajës ka përfunduar në qershor, pa shumë zhurmë një prej çështjeve të ngritura pas denoncimit të KQZ-së për disa anëtarë komisionesh e numërues votash të cilët akuzohen për “falsifikim të rezultatit të zgjedhjeve”, raporton Birn.
Procesi që zgjati nga korriku 2017 deri në qershor 2020, u mbyll me gjetjen fajtorë të Mediola Veliut, e cila u dënua me tre vjet burg, që u konvertua në shërbim prove. Veliu ishte një prej katër anëtareve të grupit të numërimit të votave dhe përfaqësonte Partinë për Drejtësi Integrim dhe Unitet.
Numëruesit Aldo Duro i PS, Arnold Kariqin e PD, Rexhep Verria i LSI u shpallën të pafajshëm, ndërsa në vendim del se ata ia kishin ngarkuar përgjegjësinë Veliut, e cila kishte pasur për detyrë tabelimin e rezultateve dhe pretenduan se kishin firmosur në mirëbesim.
Në vendimin e gjykatës shpjegohet se në tre kuti votimi të numëruara nga katër personat më sipër ishin shtuar 20 vota për PDIU sipas rinumërimit nga KQZ, ndërsa ndryshimi për partitë e tjera ishte me vetëm një votë. Gjykata arsyetoi se Veliu duke qenë përfaqësuese e kësaj force dhe personi që kishte tabeluar rezultatet, ishte e vetmja që kishte përgjegjësi.
“Sa më sipër gjykata vlerëson se provohet se e pandehura Mediola Veliu ka pasur si synim falsifikimin e rezultatit zgjedhor nëpërmjet paraqitjes në tabelat e numërimit të të dhënave të pavërteta që favorizonin subjektin interesat e të cilës ajo mbronte. Ndërsa të pandehurit e tjerë Rexhep Verria, Arnold Kariqi dhe Aldo Duro, në kushtet e mirëbesimit kanë nënshkruar tabelat zgjedhore, të përpiluara prej saj”, thuhet në vendim.
Për ironi hetimet filluan pas denoncimit në KQZ të PDIU e cila humbi vetëm për pak vota një mandat deputeti në Tiranë.
Rasti megjithatë prek vetëm sipërfaqësisht dyshimet e shumta të ngritura për zgjedhjet e vitit 2017, të cilat opozita i konsideron të manipuluara. Një sërë përgjimesh në një hetim kundër trafikut të drogës, si pjesë e të ashtuquajturës “Dosja 339” zbuluan përfshirjen e një grupi të dyshuar kriminal në manipulimin e zgjedhjeve në zonën e Durrësit në favor të shumicës socialiste.
/GazetaReforma.com/
