Ditën e sotme autoritetet shëndetësore vendosën që të aplikohet doza e tretë e vaksinës për qytetarët mbi 60-vjeç. Gjithashtu ata kanë aprovuar se mund të vaksinohen të gjithë ata persona që janë mbi 16-vjeç dhe fëmijët mbi 12-vjeç që kanë probleme shëndetësore.
Së fundmi në lidhje me këtë vendim ka reaguar edhe zv.ministrja e Shëndetësisë, Eugena Tomini, e cila ka thënë se duke filluar nga 1 nëntori prindërit duhet të aplikojnë që fëmijët e tyre të marrin dozën e vaksinës. Tomini bën me dije se të fëmijët do të aplikohet vaksina Pfizer.
“Nga 1 nëntori janë të lutur të gjithë prindërit që të aplikojnë për kryerjen e vaksinës në këtë fashë moshash. Fëmijët do mund të vaksinohen me Pfizer.
Gjatë gjithë fazës së pandemisë, ka pasur një numër të ulët të prekjes së të vegjëlve, por kjo s’do të thotë se nuk ka ekzistuar, dhe prandaj s’duhet neglizhuar. Ndërkohë një pjesë e mirë e tyre, kanë nxjerrë në pah se pjesa asimptomatike e kësaj fashe, i ka vënë në dukje se dhe mosha pediatrike preket”, tha Tomini në Zona Zero.
Po ashtu ajo ka theksuar se të gjithë ata që janë mbi 60-vjeç do të marrin dozën e tretë sipas të njëjtës vaksinë që kanë bërë dy dozat e para.
“Doza e tretë vetëm për ata mbi 60 vjeç apo dhe ata në rriskë. Nga 1 nëntori do vaksinohen, synimi është të vaksinohen me të njëjtën vaksinë për fashat e riskut, të gjithë do të jenë të detajuara, lloji i dozës, fashat që përmendëm, dhe grupet e riskut”, tha ajo.
