Vjeshta ka trokitur dhe reshjet intensive të shiut dhe stuhitë e erës kanë përfshirë vendin tonë. Sinoptikania Lajda Porja, thotë se reshjet e shiut do të vazhdojnë deri në mesnatë dhe ka theksuar se do të jenë në jug të territorit.
Porja ndër të tjera tha se dobësimi i intensitetit të reshjeve parashikohet të nisin të premten. Po ashtu ka bërë me dije se temperaturat do të vazhdojnë të zbresin deri në tre gradë Celsuis në zonat malore.
“Zonat që do të marrin më shumë reshje do të jenë ato të jugut ku do të jenë edhe mbi 100 mm. Duhet theksuar se 100 mm shi në një kohë shumë të shkurtër janë një sasi shumë e madhe në krahasim me kuotat mujore.
Temperaturat do të vijojnë të zbresin deri në tre gradë në zonat malore.”, ka thënë Lajda Porja.
Sinoptikania ndër të tjera ka thënë se i ftohti mund të ndihet më shumë për shkak të fuqizimit të erës në brigjet e Jonit. Gjithashtu Porja ka parashikuar se tetori do të mbyllet si një muaj tipik vjeshte.
“Në momente të veçanta do të kemi edhe erë deri në 70 km/h. Sidomos në brigjet e Jonit ku do të ketë probleme edhe me trafikun detar duke qenë se parashikohet që herë pas here të kemi një dallgëzim pesë apo gjashtë ballë. Kjo do të jetë deri të shtunën dhe të dielën.”
