Pas hyrjes në fuqi të orës së re policore pas orës 20:30 ditën e sotme, në të gjithë vendin policia ka patrulluar për të parë mbarëvajtjen e aktit të ri normativ dhe vendimit të Komitetit të Ekspertëve për respektimin e protokollit anti-covid.
Përveç kryeqytetit I cili ka patur shumë patrulla policie në terren, edhe durrsakët i janë bindur orës policore dhe policia ka ngritur postblloqet në disa pika të qytetit. Policia e Durrësit ka bërë verifikimi i mjeteve që kanë dalë në rrugë pas orës 20:30.
Fillimi i orës policore, ka gjetur edhe rrugët e qytetit të Beratit totalisht të boshatisura dhe baret e restorantet të mbyllura, ndërkohë që të gjitha rrugët e qytetit janë blinduar nga forca të shumta policie.
Ashtu siç edhe u vendos nga Ministria e Shëndetësisë për ndryshimin e orarit të karantinës, baret dhe restorantet në Berat shpejtuan të mbyllin qepenat disa minuta përpara orës 20:30,për të respektuar masat e vendosura, si e vetmja mënyrë për të minimizuar përhapjen e Covid-19.
Edhe pse Korça pati një numër të lartë turistësh për Krishtlindje, pas orës 20:30, qytetin e pushtoi “heshtja”.
Ndërkohë patrulla të ndryshme policie janë ngritur në rrugët kryesore të qytetit dhe jo vetëm për të monitoruar situatën dhe informuar çdo qytetar që shkel orën e përcaktuar. Dukshëm të gjitha bizneset, baret, lokalet janë mbyllur pa shkuar ora 20:30.
Edhe në Sarandë ndryshimi i orës, në zbatim të orës policore i ka gjetur rrugët e qytetit të boshatisura. Policia ka ngritur postblloqe në disa nga pikat kryesore të qytetit.
Në gjithë qytetin ka mbizotëruar qetësia, teksa në lëvizje janë vetëm efektivët e policisë dhe bizneset të cilat ofrojnë shërbim taksi./Gazetareforma.com/
