Një prej të arrestuarve për grabitjen e Rinasit, i njohuri si “Daja” nga Kosova, duket se nuk do të kalojë lehtë.
Ditën e sotme ka qenë vëllai i Ragip Haxhiajdinit, Mustafa Haxhiajdini që ka folur para mediave dhe ka thënë se i vëllai i tij nuk ka asnjë lidhje me grabitjen e ndodhur në 9 prill. Sipas Mustafa Haxhiajdinit, arrestimi i të vëllait ka ardhur pas pranisë së tij në varrimin e Admir Muratajt dhe ai është vetëm një viktimë në gjithë këtë skemë, vetëm sepse ka njohje të afërta familjare me Muratajt.
“Policia s’na ka kontrolluar. S’vjen dot të më kontrollojë mua kur jam i pastër. Punoj me djersën e ballit. Ai është viktimë. Është arrestuar se mori pjesë në varrimin e Admirit. Po në varrim isha edhe unë. Kur tjetri të vjen në dasëm, ti i shkon në mort”,-u shpreh ai.
Mirëpo emri i Haxhiajdinit nuk përmendet për herë të parë për vjedhje, pasi është akuzuar edhe për grabitjen e 24 kilogramëve ar në qytetin e Pejës, mirëpo gjykata e ka nxjerrë të pafajshëm.
“Gjykata e Pejës ka marrë pafajësi, ka qenë i arrestuar, por nuk kishte dëshmi, vetëm policia i merr ato gjëra, se nuk mundet një njëri të marrë arin në polici”, tha vëllai i tij.
Ka qenë edhe djali i tij, Dardan Haxhiajdini që ka bërë një pohim i cili duhet të merret parasysh nga policia, pasi ka thëën se nuk kishte nevojë babai i tij të vidhte pasi familja ka të ardhura vet.
“Kemi të ardhura, nuk kemi nevojë të grabisim”, u shpreh Dardan Haxhiajdini.
I ashtuquajturi “Daja” është arrestuar në 26 prill, pasi emri i tij doli nga njëri prej të arrestuarve, Alkon Bengasi, i cili gjatë dëshmisë së tij e ka përmendur si bashkëpunëtor të ngushtë të Admir Muratajt së bashku me një person tjetër nga Kosova.
