Për familjarët e Arjan salës, humbja e njeriut të tyre të dashur ka qenë mjaft e vështirë. Ata u detyruan të prisnin për tre ditë me radhë jshtë magazinës në flakë të “Casa Italias”, deri sa trupi i pajetë i Arjanit u gjet, ndërsa vazhdimisht kanë bërë thirrje për ndërhyrje dhe ndihmë për gjetjen e 33-vjeçarit.
Vëllai i Arjan Salës, Edmond Sala dhe xhaxhai i tij kanë folur pasditen e sotme në emisionin e Rudina Magjistarit në TV Klan, ku kanë treguar ngjarjen e vështirë që i ndodhi. Edmond Sala tregoi se ka qenë shumë e vështirë në momentin që ka marë lajmin dhe se ka shkuar i pari në object pasi është lajmëruar. Ai ka thënë se nata e parë ka kaluar me shpresën se Arjani do të rikthehej e se do ia dilnin ta nxirrnin që atje.
“Ishte shumë e vështirë, në momentin që mora vesh lajmin aty tek objekti, isha i pari nga familja që vajta i pari në objekt. Unë po shkoja në shtëpi dhe më tha njëri në telefon që ka rënë aty zjarr dhe ka ngelur dikush i sigurisë aty brenda. Vajta u futa tek dera, çfarë të shihja. Çava gardhin e policisë, u futa tek shkallët dhe ngela, tym, tym, tym, Gërdec, nuk di ç’të them. Kaloi nata e parë me mendimin që do rikthehet, me shpresën që do ia dalim do e nxjerrim. Kaloi dita e dytë, kaloi, dita e tretë, duke u futur në ditën e katërt ora 2 e 30-3:00 u gjet trupi i tij i ndjerë. Ishte në një dhomë aty, edhe kamerat do e kenë parë vendin. Nuk e di çfarë të them.”, ka thënë vëllai i Salës.
Ai gjithashtu ka konfirmuar se Arjan Sala ka qenë gjallë për disa orë, ditën e parë që mbeti i bllokuar, derisa në fund humbi jetën nga asfiksia.
“Aty ku është gjetur vërtet që po, është lajm i saktë sepse ne çdo gjë kemi kërkuar, kam pasur dhe xhaxhain në krah, sa e mori vesh ka ardhur dhe kemi qenë gjatë gjithë kohës në terren, por aty ishte fati i tij” ka thënë Edmond Sala.
Akti heroik i Arjan Salës shpëtoi 25 jetë njerëzish nga zjarri që shpërtheu në një magazinë të “Casa Italia”, ndërsa ditën e sotme atij iu dha edhe tituli “Dëshmor i Atdheut”.
