Kryetari i Bashkisë së Tiranës, Erion Veliaj ka paralajmëruar operatorin e linjës së urbanëve të “Kopshtit Zoologjik” për heqje licence, nëse nuk ndërron mjetet me të cilat operaon. Veliaj tha se operatori ka pesë ditë kohë, ndërsa u shpreh se autobusët në fjalë “prodhojnë kancer” dhe janë të amortizuar.
“Linja e Kopshtit Zoologjik nxjerr nga marmita kancer e kjo s’ka lidhje fare me Covidin, kjo ka të bëjë me mjete të amortizuara që janë skandal e ju kam lënë afat deri në datën 30 tetor. Keni dhe 5 ditë kohë ose do humbisni licencën siç e humbi Ferluti. Të mbjellësh pemë te liqeni, të bësh korsi biçikletash, ta bësh liqenin vendin më të vizituar dhe ta rrethosh përveç pyllit orbital me blozë orbitale kjo është e patolerueshme. Ata autobusë prodhojnë kancer, dhe minimalisht për dinjitetin e fëmijëve tanë, ju s’duhet t’i nxirrni më ata autobusë”, ka thënë Veliaj.
Kujtojmë që pak kohë më parë Erion Veliaj hoqi licencën e kompanisë që menaxhonte linjën e “Unazës së Vogël”, pas ankesave të shumta të qytetarëve. Ndërkoë, operatorët kanë përgjysmuar urbanët me të cilët operojnë dhe kanë paralajmëruar rritje të çmimit të biletës, pasi sipas tyre nuk u janë kompesuar humbjet që sektori i transportit publik ka pësuar gjatë pandemisë.
