Përgjimet për shitjen e votës ku më i lakuari ka qenë emri i kryebashkiakut të Durrësit, Vangjush Dako duket se nuk janë duke shqetësuar një prej personave më të vlerësuar nga Rama, Erion Veliajn.
I ftuar mbrëmjen e sotme në “Opinion”, Veliaj ka thënë se përgjimet që janë bërë publike tashmë, janë thjesht filma dhe asgjë më shumë, ndërkohë që sipas tij shqetësimi më i madh mbeten protestat.
Nuk mund të digjet Shqipëria, sipas tij, nëse një politikani apo ish-politikani nuk i japin vizë duke thënë hapur se fjala këtu ka qenë për ish-kryeministrin Berisha.
Ndërsa përsa i përket çështjes së Dakos, Veliaj është shprehur shumë pak në krahasim me ato që ka thënë për opozitën.
Pjesë nga biseda
Fevziu: Keni kolegun e tuaj të Durrësit që del në përgjime për shitblerje votash, keni drejtorin e policisë së Fierit që i jep lekë një trafikanti. Është tmerr.
Veliaj: Unë nuk merrem më këto filma. Unë shkoj çdo ditë në punë për qytetin. Se një politikani nuk i japin vizë, të digjet e gjithë Tirana? Fëmijët i mësojmë që të mos jenë bullistë, i forti nëse godet largohet nga shkolla. Ata 1000 veta që ishin sot, duan të bindin gjithë Shqipërinë që Saliu nuk merr vizë amerikane, që Luli nuk shkon në familjen e tij në Holandë, të djegin Tiranën. Po të kishte bërë Edi Rama pagesë te rusët, këtu s’do mbaronte emisioni. Të gjithë fëmijët i kanë me pasaporta austriake.
Fevziu: Përgjimet janë të bëra nga prokuroria, me vendim gjykatë. Pagesa ruse nuk është vërtetuar. Përgjime për drejtorin e policisë, bashkiakun e Durrësit janë zyrtare. Nuk ka një dopio standard.
Veliaj: Unë i them opozitës që ka 2 vjet e gjysmë jashtë, një parti që flet për skamje, nuk mund të mos votojë ndihmën ekonomike, një parti që flet për strehim, nuk vjen të votojë banesat. Kjo është hipokrizi.
