Kryebashkiaku, Erion Veliaj ka konfirmuar rikandidimin për drejtimin e Bashkisë së Tiranës edhe për 4 vite të tjera.
“Mezi e pres që të fillojmë këtë mandat të dytë, me projekte të reja, por dhe me gjëra që kemi mësuar si t’i bëjmë më mirë”-ka thënë ai për “Top Channel”.
“Të jemi të gjithë të shtunën në Kongresin e PS-së, ku ne do të shpallim në publik, jo në salla të mbyllura, kandidaturën për një mandat të dytë të Tiranës, si dhe Këshillit Bashkiak të Tiranës, në orën 11 te sheshi ‘Nënë Tereza’. Është një mënyrë që qyteti ngre kokë dhe më shumë se një përsëritje e Ditës së Verës, në një pranverë të fushatës sonë të dytë”, tha Erion Veliaj.
Për sa i përket pjesëmarrjes së opozitës në zgjedhjet lokale, Veliaj e sheh pozitive.
“Të vijë Luli, Saliu…të dy bashkë! Të vijë kush të dojë. Por, rëndësi ka të kemi një pjesëmarrje. Qoftë dhe ajo pakicë që e voton ende PD-në, të ketë edhe ajo përfaqësuesit e vet në Këshillin Bashkiak. Sepse unë besoj që gjithmonë duhet një mendim alternativ”, tha Erion Veliaj.
Veliaj mendon se veprimet e opozitës kanë të fshehura pasigurinë e tyre.
“Më duket sjellje humbësi dhe tregon pasiguri”, tha kryebashkiaku i Tiranës.
