Kryeministri i Shqipërisë, Edi Rama, së bashku me kryebashkiakun e Tiranës, Erion Veliaj, kanë inspektuar kantierin e rindërtimit tek “5 Maji’’ në kryeqytet. Kryeministri Rama ka konfirmuar se në fund të vitit futen njerëz në apartamentet që përfundojnë deri në dhjetor.
Nga ana tjetër, kryebashkiaku Veliaj shpjegoi se ka filluar tashmë puna me infrastrukturën, do të kalojnë shpronësimet dhe më pas javën tjetër, do të hapet aksi rrugor.
“Tani kemi filluar me infrastrukturën. Kalojnë shpronësimet, javën tjetër hapet aksi rrugor. Do jetë i gjithë një rrethrrotullim i madh që lidh këtë rrugë me pingulen tjetër që do jetë deri te Bregu i Lumit, pastaj bashkohet me unazën e pestë me urë eventualisht. Në këtë lagje kemi dy institucione fetare, një kishë dhe një xhami, meqë komuniteti është goxha i madh”, tha kryebashkiaku Erion Veliaj.
Ndërkohë, Arben Ahmetaj sqaroi se në njësinë e re të banimin do të strehohen 640 familje që humbën banesat e tyre në tërmetin e 26 nëntorit të 2019, teksa 370 prej tyre po ngrihen banesa kolektive.
“Tek blloku tjetër janë ndërtesat publike, që nga godina e integruar e institucioneve të të ardhurave, kemi dy shkolla, një kontribut i qeverisë greke, kemi dhe ndërtesën e IT që është kontribut i qeverisë italiane,” u shpreh Ahmetaj.
