Peter Higgs, fizikanti fitues i çmimit Nobel, i cili zbuloi grimcën e njohur si “grimca e Zotit”, ka ndërruar jetë në moshën 94-vjeçare. Familja e tij njoftoi sot se ai vdiq të hënën në shtëpinë e tij në Edinburg. Ai ishte nderuar me Çmimin Nobel në Fizikë në vitin 2013 për punën e tij, e cila tregoi se si bozoni është ‘lidhja kohezive’ e materies, duke u dhënë grimcave masën e tyre.
Ekzistenca e grimcës ka qenë temë e polemikave shkencore për dekada. Pas një sërë eksperimentesh duke filluar nga viti 2008, teoria e tij u vërtetua e saktë nga fizikanët që punonin në “Large Hadron Collider” në Cern të Zvicrës në vitin 2012. Një vit më pas Higgs ndau çmimin Nobel me Francois Angler, një fizikan teorik belg, puna e të cilit gjithashtu kontribuuoi në zbulimin e rëndësishëm.
Higgs kaloi pjesën më të madhe të jetës së tij akademike në Universitetin e Edinburgut, ku edhe themeloi Qendrën Higgs për Fizikën Teorike. Ai ishte një njeri që nuk i pëlqente aspak publiciteti. Në ditën kur mori Nobelin, ai ishte larguar nga shtëpia për drekë, supë dhe troftë dhe nuk e kishte ndjekur fare ceremoninë. Lajmin se kishte fituar çmimin Nobel, Higgs-it ia dha një fqinj teksa po kthehej në shtëpi.
I lindur në Newcastle, Higgs la pas dy djem, Chris dhe Jonny, nusen e tij Suzanne dhe dy nipër e mbesa. Ish-gruaja e tij, Jody, një pedagoge e gjuhësisë, ndërroi jetë në vitin 2008.
