Prokurorët dhe ekspertët nga Peruxhia mbërrijnë në Pukë për të bërë ekspertizën e makinës së djegur të italianit Davide Pecorelli.
21 ditë më parë në aksin Pukë-Tiranë, në brenda automjetit “Skoda fabia” u gjetën eshtra njeriu dhe dyshohet se janë të biznesmenit italian. Policia italiane dhe ajo shqiptare janë bërë bashkë në zbardhjen e kësaj ngjarje.
Në ekspertizë merrnin pjesë dy drejtuesit shqiptarë të policisë së krimeve, Tonin Vocaj dhe Arben Dashi.
Pasi është këqyrur makina dhe fotografuar edhe nga heteuesit italian, dy grupet kanë vazhduar takimin në ambientet e prokurorisë së Pukës e cila udhëheq këto hetime.
Prokuroria e Peruxhias ende nuk ka përfunduar krahasimin e ADN-së së dërguar nga Shqipëria të mbetjeve njerëzore gjetur në makinën e Pecorellit, me ato të vëllait të tij në Itali, që do të jepnin përgjigjen finale nëse personi i djegur është apo jo biznesmeni italian.
Skeleti i automjetit të 45 vjeçarit mbahet në garazhdin e policisë së Pukës ende si një skenë krimi, ndërsa pistat e hetimit janë fokusuar tek vetëvrasja si pista e parë dhe vrasja. Burime nga grupi hetimor bënë me dije se sot midis policisë shqiptare dhe asaj italiane diskutohen rezultatet e ekspertizave pirroteknike për të zbuluar shkakun e rënies së zjarrit, ato të mjekësisë ligjore për shkakun e vdekjes dhe ekspertiza autoteknike e mjetit.
Ndërkohë ekzaminimi i telefonit të Pecorellit ka zbuluar se nuk ka asnjë kërcënim me jetë, biseda ku ai ka shfaqur frikë apo ka qenë i shqetësuar për jetën.
Disa prej kontakteve të tij, mes tyre dhe bashkëshortja shqiptare të pyetur nga policia kanë treguar se ai u kishte thënë se kthehej në Itali pas pak ditësh. Prej tre javësh ende mbetet mister arsyeja e udhëtimit të tij drejt Pukës dhe qëndrimi në hotel Turizmi për dy ditë teksa fillimisht prenotoi një dhomë për tre ditë. Biznesmeni italian rezulton se nuk ka takuar askënd në Pukë ndërsa pak fjalë i ka shkëmbyer me stafin e hotelit prej orës 21:30 të 4 janarit kur u paraqit. Prej vitit 2020 ky ishte udhëtimi i pestë i Pecorellit në Shqipëri teksa së fundi kishte hapur edhe një NIPT biznesi me produkte kozmetike në qytetin e Vlorës. /Gazetareforma.com/
