Policia e Bulqizës ka arrestuar pesë punonjës të stafit teknik të kompanisë minerare “Gerti sh.p.k.”, pas aksidentit tragjik që i mori jetën 66-vjeçarit Fari Veliu, i cili punonte në një minierë kromi në këtë zonë. Ngjarja ndodhi një ditë më parë si pasojë e rrëzimit të një masivi shkëmbor në galeri.
Sipas njoftimit zyrtar të Policisë, të arrestuarit janë identifikuar me inicialet Nj. P., 46 vjeç, B. Ç., 68 vjeç, F. T., 61 vjeç, E. K., 35 vjeç dhe E. Xh., 51 vjeç – të gjithë pjesë e stafit teknik të subjektit minerar. Hetimet paraprake kanë treguar se këta persona nuk kishin marrë masat e nevojshme për të garantuar sigurinë teknike në vendin e punës, çka dyshohet se çoi në aksidentin fatal.
“Bazuar në veprimet hetimore dhe operative të kryera, u evidentua se punonjësit në fjalë nuk kishin siguruar kushtet e nevojshme të mbrojtjes në punë në galerinë ku ndodhi ngjarja,” thuhet në deklaratën e policisë.
Ngjarja ka ndodhur në minierën që administrohet nga kompania “Gerti sh.p.k.”, me aksioner të vetëm Jeton Danin. Kjo kompani është përmendur edhe më herët në lidhje me incidente të tjera në vendin e punës.
Materialet në lidhje me çështjen i janë referuar Prokurorisë së Rrethit Gjyqësor Dibër për vijimin e procedurave për veprën penale “Shkelja e rregullave të mbrojtjes në punë”, me pasojë vdekjen.
