Shtyhet me një javë bllokimi i ish- sheshit ‘Shqiponja’. Rruga ka ditë që është e bllokuar për vazhdimin e punimeve për ndërtimin e mbikalimit, duke krijuar një problem të madh për çdo mjet që hyn në Tiranë.
Drejtori i Policisë së Tiranës Rebani Jaupaj ka njoftuar do të kufizohet trafiku në zonën e Unazës së Madhe tek ish sheshi “Shqiponja” pasi do të shemben disa objekte tek zona e Astirit.
“Ne do të bëjmë ndryshim të planit të veprimit të policisë. Do të shtojmë forcat e policisë. Bashkia do na vijë në ndihmë me korsinë e emergjencës. Do mbajmë një korsi emergjencash ndërsa pjesën tjetër do ta menaxhojmë në tre korsi hyrjen në Tiranë. Do të menaxhojmë këtë trafik dhe kërkojmë mirëkuptimin e qytetarëve. Rruga e Elbasanit do të na ndihmojë. I bëj thirrje drejtueseve të mjeteve që e kanë të domosdoshme të vijnë në Tiranë të gjejnë rrugë alternative. Mund të aksesohet edhe rruga e Ndroqit. Qytetarët të eliminojnë lëvizjet e pa domosdoshme nga dogana. Të përdoret edhe rruga nga Rrogozhina deri në Elbasan për të ardhur nga Rruga e Elbasanit”, tha Jaupaj.
Ndërsa ministrja e Infrastrukturës, Belinda Balluku u shpreh se punimet do të zgjasin përreth 4 muaj. Gjatë kësaj periudhe trafiku do të vijojë të mbetet i kufizuar.
“Qytetarët shikojnë bllokimin dhe mendojnë se nuk po punohet. Nyja e Shqiponjës është mjaft e rëndësishme dhe me tre nivele që do të shpërndajë të gjithë trafikun”, tha Balluku.
Erion Veliaj, kryetar i bashkisë Tiranë, para një muaji prezantoi planin e ri të qarkullimit të automjeteve në Tiranë, por duket se gjithçka ka mbetur në letër, pasi trafiku ka kaluar në kolaps. Sipas njoftimit të Bashkisë, përveç veturave, urgjencës, zjarrfikëses dhe autobusëve urban, çdo mjet tjetër është ndaluar të qarkulloj në unazën e vogël të qytetit.
Gjithashtu, kufizime do të ketë për mjetet e transportit të mallrave, apo ato me ngarkesë me mbi 3.5 ton.
/GazetaReforma.com/
