Ministrja e Kulturës, Elva Margariti ka bërë me dije se varri masiv i zbuluar ditën e sotme në Përmet mund të jetë i Periudhës së Mesjetës. Kjo është konstatuar pasi specialistët realizuan inspektimin dhe vlerësimin e gjetjeve arkeologjike në terren.
Ndërkohë, rezultatet e gërmimit arkeologjik të shpëtimit, do të paraqiten për shqyrtim në mbledhjen e ardhshme të Këshillit Kombëtar.
Postimi i Margaritit:
Një varrezë mesjetare zbulohet në Përmet!
Gjatë monitorimit të punimeve për zbatimin e projektit Task 5, “Për zhvillimin e integruar urban dhe turistik Berat- Përmet”, dolën në dritë disa varre.
Drejtoria Rajonale e Trashëgimisë Kulturore, Gjirokastër ndërmori menjëherë pezullimin e punimeve, dhe në datën 07.07.2021 specialistët tanë realizuan inspektimin dhe vlerësimin e gjetjeve arkeologjike në terren.
Nga rezultatet paraprake mendohet se kemi të bëjmë me një varrezë të periudhës mesjetare.
Në mbledhjen e djeshme të Këshilit Kombëtar të Trashëgimisë Kulturore Materiale u diskutua dhe u përcaktua kryerja e gërmimit arkeologjik të shpëtimit nga ana e Institutit Kombëtar të Trashëgimisë, për varrezën e identifikuar.
Rezultatet e gërmimit arkeologjik të shpëtimit, do të paraqiten për shqyrtim në mbledhjen e ardhshme të Këshillit Kombëtar.
Varri masiv në u zbulua në lagjen e re në Përmet gjatë punimeve për infrastrukturën e rrugës. Në të u gjetën 4 trupa, ndërsa përfaqësues të të përndjekurve komunistë deklaruan se ato mund të jenë të periudhës së diktaturës, pasi në atë zonë ka pasur ish-repart të Ministrisë së Brendshme.
