“Omicron”, varianti i ri i Covid-19 ka ngjallur alarm në të gjithë botën dhe po përhapet me shpejtësi çdo ditë e më shumë.
Ndërsa mjeku i sëmundjeve infektive në Singapor, kështë shprehur se varianti i ri “Omicron” ka të ngjarë të pushtojë të gjithë botën në intervalin kohor nga 3 deri më 6 muaj.
Pavarësisht se vaksinat kundër këtij lloji mund të zhvillohen shpejt, ato duhet të testohen përgjatë një periudhe që zgjat tre deri në gjashtë muaj, për të provuar se mund të ofrojnë imunitet kundër variantit, tha të mërkurën Dr. Leong Hoe Nam nga Spitali Mount Elizabeth Novena.
“Por sinqerisht, Omicron do të dominojë dhe pushtojë të gjithë botën për tre deri në gjashtë muaj”, tha ai për “Street Signs Asia” të CNBC.
Ndërsa Delta, lloji që aktualisht përbën 99% të infeksioneve Covid, filloi të përhapej më shumë në shtetin indian të Maharashtra në mars 2021 dhe u bë dominues në shkallë globale brenda korrikut, sipas Reuters.
CEO i Moderna, Stephane Bancel, u shpreh se do të duhen muaj për të zhvilluar dhe për të nxjerrë një vaksinë që targeton në mënyrë specifike variantin Omicron.
CEO i Pfizer, Albert Bourla, tha gjithashtu se vaksinat mund të jenë gati në më pak se 100 ditë, ose në pak më shumë se tre muaj.
“Ide e mirë, por sinqerisht, nuk është praktike,” tha Leong për një vaksinë që targeton në mënyrë specifike Omicron. “Ne nuk do të jemi në gjendje t’i nxjerrim me shpejtësi vaksinat dhe deri në momentin që ato do të dalin, praktikisht të gjithë do të jenë infektuar me Omicron duke pasur parasysh këtë infektueshmëri dhe transmetueshmëri kaq të lartë.”
Ekspertët nuk e dinë saktësisht se sa ngjitës është ky variant me një numër kaq të madh mutacionesh, por proteina spike e virusit – e cila kapet pas qelizave njerëzore – ka mutacione që lidhen me transmetueshmërinë më të lartë dhe me uljen e mbrojtjes së antitrupave.
“Tipi i këtyre mutacioneve tregon qartë se varianti i ri do të ketë një avantazh për sa i përket transmetueshmërisë dhe se mund të shmangë mbrojtjen imunitare që mund të merrnit,” tha eksperti amerikan i sëmundjeve infektive, Dr. Anthony Fauci, për “Meet the Press” të NBC të dielën.
