Mbi 245 mijë qytetarë në Shqipëri jetojnë në kushte varfërie të skajshme, sipas të dhënave të INSTAT, të rishikuara mbi bazën e Censit të Popullsisë 2023.
Të dhënat e Anketës së të Ardhurave dhe Nivelit të Jetesës tregojnë se 10.2% e familjeve deklarojnë se e sigurojnë jetesën “me shumë vështirësi”. Në vitin 2021 ky tregues ishte 18%, por ulja lidhet kryesisht me kalibrimin statistikor mbi strukturën e re demografike, jo domosdoshmërisht me përmirësimin real të jetesës.
Sipas përllogaritjeve, aktualisht rreth 245,015 individë në vend ndodhen në këtë kategori. Treguesi bazohet në vetëdeklarimin e qytetarëve për të ardhurat dhe mundësinë e tyre për të përballuar nevojat bazë.
Familjet që deklarojnë se jetojnë “me shumë vështirësi” përballen çdo ditë me privime të rënda materiale. Ato nuk arrijnë të përballojnë as një shpenzim të papritur minimal, si një emergjencë shëndetësore apo një defekt në banesë, pasi nuk kanë kursime.
Kjo shtresë has gjithashtu vonesa të përsëritura në pagesën e faturave të energjisë, ujit apo qirasë, duke jetuar nën rrezikun e ndërprerjes së shërbimeve bazë.
Varfëria prek drejtpërdrejt edhe ushqyerjen. Shumë prej këtyre familjeve nuk mund të sigurojnë një vakt me mish, peshk apo ekuivalentë të paktën një herë në dy ditë. Në dimër, pamundësia ekonomike shtrihet edhe te ngrohja e banesës, duke rrezikuar veçanërisht fëmijët dhe të moshuarit.
Po ashtu, këto familje e kanë të vështirë të zëvendësojnë pajisje bazë si frigoriferi apo lavatriçja.
Të dhënat tregojnë se kjo kategori kërkon politika të posaçme mbështetëse, pasi pa ndërhyrje të targetuara, rritja ekonomike e përgjithshme nuk përkthehet automatikisht në përmirësim të jetesës për shtresat më të varfra. /Monitor
