Temperaturat e larta të ditëve të fundit kanë sjellë një shtim të rasteve të pickimeve nga insektet dhe gjarpërinjtë, veçanërisht në zonat rurale.
Në Shërbimin e Toksikologjisë në QSUT janë paraqitur pacientë të pickuar nga gjarpërinj në gjithë territorin, por Elbasani rezulton të jetë një ndër zonat më të prekura.
“Helmimet më të shpeshta që paraqiten janë ato nga pickimi i gjarprit, merimangat, akrepi. Zona të Shqipërisë së Mesme si Elbasani, kanë pasur raste që për ne janë shumë të vështira për tu trajtuar, kryesisht nga pickimi i gjarprit”, tha Amarda Gashi, toksikologe në QSUNT.
Mjekët paralajmërojnë se në rastet e pickimit nga gjarpri, reagimi duhet të jetë i kujdesshëm dhe i menjëhershëm.
Nuk rekomandohet lidhja e gjymtyrës së kafshuar, prerja apo shpuarja e saj, pasi këto masa nuk e ndalojnë përhapjen e helmit dhe mund të përkeqësojnë gjendjen e pacientit.
“Nëse të kafshon gjarpri në këmbë, nuk duhet ta lidhim me fashë, mos ta çajmë apo shpojmë sepse helmi do bëjë ciklin e vet të penetrimit pavarësisht këtyre masave. Përveçse mund të dëmtojmë qarkullimin e gjakut, mund të shkaktojmë dhe infeksion të plagës”, shtoi Gashi.
Për të lehtësuar dhimbjet dhe shqetësimet nga pickimet, rekomandohet përdorimi i kompresave me ujë të ftohtë dhe marrja e qetësuesve që mund të përdoren pa recetë mjekësore. Megjithatë, ndihma mjekësore mbetet e domosdoshme në çdo rast.
