Presidenti Ilir Meta ka reaguar së fundmi në lidhje me aktin vandal që ka ndodhur në Parkun Arkeologjik të Bylisit, duke e konsideruar atë që ka ndodhur një akt barbar dhe e dënon me forcë.
Në një reagim në Facebook, kreu i vendit shkruan se çdo sulm ndaj trashëgimisë dhe vlerave kombëtare, sikundër ndodhi edhe me shembjen e Teatrit Kombëtar, është sulm i drejtpërdrejtë ndaj identitetit kombëtar.
Meta bën thirrje për nisjen e projektit të restaurimit dhe thekson se barbari dhe talebanizmi nuk kanë vend në Shqipëri.
Postimi i presidentit Ilir Meta:
Dënoj me forcë aktin barbar, taleban dhe anti-kombëtar të shkatërrimit të një prej monumenteve të Parkut Arkeologjik Kombëtar të Apolonisë, pjesë jashtëzakonisht e rëndësishme e fondit të vyer të trashëgimisë kulturore kombëtare.
Thellësisht i tronditur nga kjo ngjarje tepër e rëndë, apeloj me forcë nisjen e një hetimi të menjëhershëm dhe vënien para përgjegjësive ligjore të autorëve dhe frymëzuesve të tyre, të cilët duhet të marrin një dënim shembullor.
Çdo sulm ndaj trashëgimisë dhe vlerave tona kombëtare, sikundër ndodhi edhe me shembjen e Teatrit Kombëtar, është sulm i drejtpërdrejt ndaj identitetit tonë kombëtar.
Bëj thirrje për nisjen pa zvarritje të projektit të restaurimit dhe forcimin e masave për mbrojtjen e monumenteve të kulturës në të gjithë vendin, që rastet e fundit dëshmojnë se po rrezikohen nga akte barbare që as pushtuesit nuk kanë guxuar t’i bëjnë.
Barbaria dhe talebanizmi nuk kanë vend në shoqërinë tonë!
Publikimi i aktit vandal në Bylis është bërë nga Neritan Ceka, i cili në një reagim në mediat sociale ka publikuar foton e kolonave të thyera në Bylis dhe i drejtohet ministres së Kulturës, Elva Margariti, duke e pyetur se pse nuk ka reaguar dhe pse mbron ata që shkatërorjnë pasurit të rralla në vendin tonë.
