Republika e Maqedonisë së Veriut ka vendosur sot datën se kur do të mbahen zgjedhjet e reja parlamentare.
Data 15 korrik është parë si data më e mirë e mundshme për të realizuar zgjedhjet në këto kohë kur numri i të infektuarve me koronavirus po rritet dita ditës.
Ditën e djeshme në RMV u raportuan 152 raste të reja me COVID-19 dhe 3 viktima.
Ky lajm është bërë i ditur nga lideri i LSDM-së, Zoran Zaev i cili tha se është arritur konsensusi me kryetarin e VMRO-DPMNE-së, Hristijan Mickoski.
Sipas Zaev votimi do të zgjasë tre ditë: më 13 dhe 14 korrik, ndërsa të sëmurët, dhe ata që janë pozitivë për koronavirus do të votonin në karantinë.
“Ne jemi të vetëdijshëm që jemi në një moment të ndërlikuar, duhet të ndërmarrim hapa të rëndësishëm. LSDM është mbajtësi i pushtetit përgjegjës, ne duhet të bëjmë gjithçka për t’i siguruar institucioneve me kapacitet të plotë. Ne kemi nevojë për Kuvend aktiv dhe një qeveri politike funksionuese. Kjo lojë nervash në të cilën vuajnë qytetarët duhet të përfundojë. LSDM-ja po tregon edhe një herë madhështinë e saj, në mënyrë që njerëzit të mos vuajnë, e cakton 15 korrikun, si datën përfundimtare dhe të vetme për zgjedhjet.
Unë bisedova me Mickoskin dhe ai konfirmoi që ai do të kandidojë në zgjedhjet e 15 korrikut. E mërkura do të jetë ditë jo pune për të gjithë qytetarët. Kjo është për të shpëtuar shtetin. Të hënën dhe të martën do të votojnë personat e sëmurë, si dhe ata që janë pozitivë për me koronavirus, ata që janë në izolim dhe të sëmurë kronikë”, tha Zoran Zaev.
