Zyrtarët e urdhrit të Farmacistëve Shqiptarë, kanë denoncuar faktin se nëpër farmacitë e vendit ka mungesa të theksuara të barnave anti-virale që luftojnë me Covid-19, dhe se në spitale po përdoren ilaçe të pasigurta.
Ndërkohë Presidentja e Urdhrit të Farmacistëve, Diana Toma ka treguar se nuk ka një akt normativ që të vendosë raportin lidhës dhe identifikues midis përfshirjes dhe dhënies së barit për situatën që po kalojmë.
“Nga farmacistët kërkohej shumë por nuk kishte asnjë hallkë për të përcjellë problemet e farmacistëve. Gjithë këtë periudhë kanë përcjellë problematikat e tyre. Kemi bërë deklarata në mënyrë të vazhdueshme qoftë lidhur me mospërfaqësimin tonë. Ngërçe apo situata të pasqaruara vazhdojmë t’i kemi edhe sot e kësaj dite. Ende edhe sot farmacistët nuk e kanë të formëzuar mënyrën standarde për një recetë”, ka thënë presidentja e Urdhrit të Farmacistëve.
Ajo çfarë duhet të bëhet për antiviralet fillimisht është regjistrimi ose dhënia e autorizimit për import që të mos futen në të zezë.
Ndërkohë edhe Pedagogu i Shkencave Teknike Mjekësore, Gazment Koduzi, ka theksuar se tarifa e infermierit privat në shtëpi, shkon 100 mijë lekë në ditë, një kosto kjo e papërballueshme për shumicën e familjeve mesatare shqiptare. Ai gjithashtu gjatë një takimi të Urdhrit të Farmacistëve me kreydemokratin Lulzim Basha, u shpreh se për sigurimin e barnave qeveria duhet të ketë rol rregullator.
“Duhen negocime të ndryshme për të siguruar një sasi të caktuar antiviralësh, sidomos për vaksinat e gripit të stinës. 9500 vaksina janë importuar dhe tregtuar në mënyrë të menjëhershme edhe pse u theksua se do të ishin 300 mijë të tilla”, tha Koduzi.
Sekretari i Urdhrit të Farmacistëve, Goma, ka denoncuar faktin se edhe pse ndodhemi në sezonin e virozave sezonale, në spitale janë sjellur vetëm 9500 vaksina anti-grip, ndërkohë që duhen mbi 300 mijë të tilla.
“Barra financiare e rimbursimit të paketës anti-Covid nuk është e madhe për shtetin. Kostoja e rimbursimit të paketës është e përballueshme nga shteti. Janë sjellë vetëm 9500 vaksina anti-grip, ndërsa është thënë se duhet të ishin sjellë rreth 300 mijë Ka mungesa të barnave antivirale që luftojnë COVID-in. Ilaçe të pasigurta dhe të paligjshëm po përdoren në trajtimin e pacientëve”, është shprehur sekretari i Urdhrit të Farmacive, Dëfrim Goma.
Edhe kreu i PD-së, theksoi se ka mungesë së barnave në treg, ndërsa shtoi se as në Tiranë dhe as as në rrethe nuk ka asnjë dozë vaksine për gripin. Po ashtu Basha tha se edhe ilaçi “Remdeseviri” i cili mund të ndihmonte në kalimin më lehtshëm të Covidit në rast infektimi, është me çmime katastrofike në tregun e zi./GazetaReforma.com/
