Shkencëtarët dhe mjekët janë në hapat e para të eksperimentimit me vaksinat kundër koronavirusit, edhe pse deri tani janë prodhuar të paktën 4 lloje vaksinash nga 4 shtete të ndryshme.
Por pikërisht kur vaksinat po provohen në njerëz, kanë dalë edhe anomali por edhe zbulime befasuese, të cilat kanë lënë “gojë hapur” edhe vet shpikësit.
Një ditë më parë u raportua se vaksina e shumëpritur e Oksfordit ofron mbrojtje në nivelin 70%.
Por në rast se administrohet fillimisht me një gjysmë doze dhe më pas me dozë të plotë, mbrojtja arrin në nivelin 90%.
Ky zbulim befasues është bërë krejt rastësisht, pas një gabimi në dhënien e dozës.
Kështu tha kreu i kompanisë “AstraZeneca”, Mene Pangalos, raporton “Daily Mail”.
Kompania “AstraZeneca” po prodhon vaksinën në bashkëpunim me Universitetin e Oksfordit.
Pangalos tha se, ishte krejt rastësi ky zbulim. Vullnetarët në testim duhet të merrnin dy doza të plota të vaksinës.
Gjatë testimeve, shkencëtarët zbuluan se, disa vullnetarë raportonin shumë pak efekte anësore nga sa ishte menduar në fillim.
“Kështu që u kthyem pas dhe kontrolluam dhe zbuluam se, kishin marrë gjysmë doze”.
Ekipi vendosi të vazhdojë punën edhe me ata që kishin marrë gjysmë doze fillimisht. Atyre iu dha më pas doza e dytë e plotë.
Rezultatet treguan se, vaksina ishte 90% efektive tek ata. Kurse te ata që morën dy doza të plota ishte 70% efektive. “Kështu që gabimisht arritëm në këtë zbulim”,- tha Pangalos.
/Burimi: Daily Mail/Përktheu: GazetaReforma.com/
