Situata ka agravuar këtë të hënë në veri të Kosovës ku ushtarët e KFOR janë përplasur me protestuesit serbë përballë objektit të Komunës së Zveçanit. Si pasojë, disa prej ushtarëve të KFOR’it kanë mbetur të lënduar.
Bëhet fjalë për rreth 20 ushtarë (italianë e hungarezë), që kanë marrë lëndime, pasi protestuesit serbë kanë hedhur mjete shpërthyese në drejtim të tyre dhe gjësende të forta.
Por, sipas burimeve, disa prej sulmuesve tashmë janë arrestuar dhe u janë dorëzuar Policisë së Kosovës për trajtim të mëtejshëm.
Në orët e pasditës, situata ka eskaluar në Zveçan, pasi KFOR-i u bëri thirrje protestuesve që të largohen nga hapësirat afër komunës, por ata nuk pranuan.
Janë publikuar pamjet gjatë përleshjeve, ndërkaq Gazeta Express mëson nga burimet brenda institucioneve të sigurisë se janë lënduar së paku 20 ushtarë të KFOR-it.
Nga pamjet e publikuara nga mediat dëgjohen edhe krisma, që nuk dihet se nga vijnë.
Para eskalimit të situatës, KFOR-i ndërhyri për shpërndarjen e protestuesve në Zveçan. Paraprakisht i paralajmëroi protestuesit që të shpërndahen, por ata nuk u bindën.
“Ju po shkaktoni trazira. Po e rrezikoni veten dhe komunitetin tuaj. Largohuni nga zona dhe shkoni në shtëpi – në të kundërtën, KFOR-i do të detyrohet të ndërhyjë”, ishte audio-paralajmërimi i KFOR-it.
