Fluksi i fëmijëve që paraqiten çdo ditë në urgjencën pediatrike të Elbasanit mbetet i lartë, ndërsa edhe rastet që kërkojnë shtrim në pavion janë shtuar ndjeshëm.
Shefja e repartit të pediatrisë, Irena Palloshi bën me dije se simptomat më të zakonshme lidhen me virozat dhe alergjitë sezonale, të favorizuara nga luhatjet e temperaturës që karakterizojnë pranverën.
Simptomat që vijnë si pasojë e luhatjeve të temperaturave, të ndërthurura me virozat dhe alergjitë e stinës, kanë sjellë një numër të konsiderueshëm fëmijësh që paraqiten çdo ditë pranë urgjencës pediatrike. Numri i paraqitjeve mbetet ende i lartë, edhe pse krahasuar me dimrin, ka një ulje të vogël. Nga 110 paraqitje që kishim në dimër, tani numri arrin 85-90 paraqitje në 24 orë. Po ashtu, numri i shtrimjeve mbetet i lartë, me disa ditë ku ky numër arrin deri në 50 shtrime.
Luhatjet e temperaturave dhe stina e pranverës kanë sjellë gjithashtu një rritje të alergjive, duke përfshirë konjuktivitët, laringitet dhe bronkiolitët. Megjithatë, ajo që ka ndodhur këtë javë është shtimi i fëmijëve me probleme të traktit gastrointestinal. Kjo javë ka pasur shumë fëmijë me diarre dhe të vjella. Po ashtu, ka pasur raste me temperaturë të lartë që ka vazhduar për 24 orë, shpesh si pasojë e infeksioneve virale.
Mjekët u bëjnë thirrje prindërve të tregojnë kujdes të shtuar për higjienën, veshjen e përshtatshme dhe mbi të gjitha për një ushqyerje të shëndetshme.
Përdorimi i lëngjeve natyrale, sidomos në këtë periudhë, ndihmon në përballimin e gjendjeve gripale dhe forcimin e imunitetit tek fëmijët.
