Urdhri i Psikologut në Shqipëri i ka drejtuar një kërkesë Ministrisë së dhe Komitetit Teknik të Ekspertëve për vaksinimin e psikologëve ndaj COVID-19. Në letrën e firmosur nga presidentja Valbona Treska thuhet se psikologët nuk kanë ndaluar asnjë moment së ofruari shërbimin, madje edhe kur vendi ka qenë në karantinë. Ashtu si në profesionet e tjera që kanë kontakt të drejtpërdrejtë me qytetarin, edhe mes psikologëve ka pasur raste të shumta të infektimit me koronavirus, thuhet më tej.
“Në kushtet kur ka nisur vaksinimi kundër COVID-19, do të kërkonim nga ana juaj që një vëmendje e veçantë të mbahet edhe për punonjësit psikologë të cilët aktualisht po e ushtrojnë profesionin, duke u përballur me rrezikun e infektimit, për shkak të kontaktit të drejtëpëdrejtë me individët, ndaj të cilëve ofrojnë shërbimin e tyre. Siç ju jeni tashmë në dijeni, psikologët kanë dhënë e po vijojnë të japin një ndihmë të çmuar në përballjen me pandeminë. Ne nuk kemi ndaluar asnjë ditë së ofruari shërbimin madje edhe në ditët që i gjithë vendi ka qenë në karantinë të plotë. Sikundër në të gjitha profesionet e tjera që janë në kontakt të drejtpërdrejtë me qytetari, deri më tani kemi pasur me dhjetëra e dhjetëra kolegë, të cilët janë përballur ashpër me virusin dhe kanë rrezikuar jetën e tyre e të familjarëve”, shkruhet në letër.
Më tej thuhet se psikologët përballen me të njëjtën rrezikshmëri sikurse punonjësit e shëndetësisë dhe mësuesit, jo vetëm në qendra spitalore, por edhe në ambiente të tjera.
“Psikologët sikundër punonjësit e shëndetësisë dhe mësuesit, përballen me të njëjtat rrezikshmëri, për t’u infektuar dhe kjo jo vetëm për ata psikologë, të cilët kanë qenë pjesë e Qendrave Spitalore COVID, por edhe të gjithë profesionistët e tjerë psikologë.”, thuhet në kërkesë
Aktualisht në Shqipëri janë rreth 1500 psikologë që ushtrojnë profesionin e tyre. Procesi i vaksinimit në vend ka nisur për moshat e treta, për mjekët e tashmë edhe për mësuesit.
