Një ditë pas aksidentit të frikshëm që ndodhi në afërsi të kinema Agimi, autobusi i shërbimit urban, qëndron ende mbi lumin e Lanës.
Kryetari i Bashkisë së Tiranës Erion Veliaj ka hedhur idenë e mbajtjes së autobusit të aksidentuar pasditen e djeshme mbi Lanë, si një shenjë sensibilizimi ndaj drejtuesve të mjeteve për shmangien e aksidenteve në kryeqytet.
Po për këtë Veliaj ka zgjedhur të marrë edhe mendimin e qytetarëve, teksa e ka kthyer idenë e tij në formën e një sondazhi në rrjetet sociale.
“Fatmirësisht aksidenti më i çuditshëm në një shekull kryeqytet qe pa pasoja për jetën! Por teksa po përgatiteshim për të hequr autobusin mbi Lanë, shumë vete propozuan ta lëmë si një instalacion për kujdesin në timon e urë alternative mbi Lanë! Si mendon shumica? – shkruan Veliaj.
Kujtojmw qw si pasojw e aksidentit mbetën të lënduar 5 persona, 4 prej të cilëve gjatë orëve të para të mëngjesit të sotëm lanë ambientet e spitalit të Traumës në Tiranë.
Në mesin e personave të plagosur janë drejtuesit e të dy mjeteve, faturino i urbanit, si dhe dy pasagjerë, njëri në mjetin e transportit publik, dhe tjetri në makinën që përfundoi në Lanë poshte rrotave të autobusit.
Fillimisht policia njoftoi për 2 persona të lënduar, por më pas burime nga Trauma thanë se numri i të plagosurve ishte 5.
Në vendin e ngjarjes mbërritën mbrëmjen e djeshme ministrja e shëndetësisë Ogerta Manastirliu si dhe kryebashkiaku i Tiranës Erion Veliaj. Ky i fundit tha se asnjë prej drejtuesve të mjeteve nuk u gjet pozitiv për përdorimin e alkoolit, ndërkohë që linja urbane u inagurua vetëm para një jave prej tij.
