Unioni i Gazetarëve Shqiptarë ka reaguar ashpër ndaj draftit të ri të Kodit Penal, duke e cilësuar atë si një kërcënim serioz për të drejtat themelore dhe lirinë e shprehjes. Në një deklaratë zyrtare, UGSH ngre shqetësime të forta për disa nene specifike që, sipas tyre, rrezikojnë të përdoren në mënyrë arbitrare ndaj gazetarëve dhe qytetarëve kritikë ndaj institucioneve publike.
Në deklaratë thuhet se projektligji, tashmë i shpërndarë zyrtarisht, po kundërshtohet nga shumë juristë, pedagogë, ekspertë të fushës dhe gazetarë që ndjekin çështje juridike, për shkak të pasigurisë ligjore që krijon dhe mundësive për abuzim.
Sipas UGSH-së, drafti i ri i Kodit Penal përmban formulime të paqarta dhe të dykuptimta, që hapin rrugën për interpretim subjektiv dhe ndëshkime të padrejta. “Ashpërsimi i ndëshkimeve të parashikuara në këtë draft është pjesë e logjikës së një legjislacioni represiv mbi qytetarët dhe veçanërisht ndaj lirisë së raportimit, shprehjes dhe përdorimit të gjuhës satirike apo humoristike në komunikimin publik”, thuhet në reagimin e tyre.
UGSH i kushton vëmendje të veçantë Neneve 120, 236, 240, 241, 536 dhe 865 të draftit. Ndër to, përmendet rasti i Nenit 236, që parashikon ndëshkime për “përdhosjen” e emrit apo imazhit të institucioneve të larta si Presidenti i Republikës, Kuvendi apo Qeveria. Sipas UGSH-së, kjo dispozitë përbën një rrezik të drejtpërdrejtë për mediat, pasi personat në fjalë janë figura politike dhe publike që duhen trajtuar me standarde të ndryshme nga simbolika shtetërore.
Sipas Unionit, këto dispozita rrezikojnë të shndërrohen në mjete për ndëshkimin e shprehjes kritike dhe raportimit të lirë, ndërsa mund të përdoren për të çuar gazetarët në gjykatë ose përballë prokurorisë për çështje të natyrës editoriale.
UGSH kërkon që nismëtarët të ndërmarrin një rishikim substancial të draftit dhe të ndjekin një metodologji bashkëpunuese me të gjitha grupet e interesit, përfshirë organizatat mediatike dhe përfaqësues rajonalë e ndërkombëtarë. Sipas tyre, ky draft, nëse miratohet siç është, jo vetëm që shënon regres në drejtim të të drejtave të njeriut, por shpërfill edhe rekomandimet e Bashkimit Evropian dhe të Gjykatës Evropiane për të Drejtat e Njeriut, të cilat kërkojnë dekriminalizimin e shpifjes dhe mbrojtjen e fjalës së lirë.
Unioni i Gazetarëve thekson se këto ndryshime nuk prekin vetëm gazetarët, por edhe qytetarët që zgjedhin të shprehin opinionin e tyre në mënyrë kritike përmes mediave dhe rrjeteve sociale. Ata paralajmërojnë se ky është një hap i rrezikshëm drejt një sistemi juridik represiv dhe kërkojnë ndërhyrje të menjëhershme për të shmangur pasojat e dëmshme për demokracinë dhe lirinë e informimit në vend.
