Një raport alarmues i paraqitur në Këshillin e Sigurimit të OKB-së nga UNICEF ka zbuluar përmasat tragjike të dhunës ndaj fëmijëve në Gaza: mbi 17,000 fëmijë janë vrarë gjatë 21 muajve të fundit të konfliktit, me një mesatare prej 28 fëmijësh që humbin jetën çdo ditë.
Drejtoresha Ekzekutive e UNICEF-it, Catherine Russell, e përshkroi situatën si katastrofike, duke theksuar se çdo fëmijë në Gaza është i ekspozuar ndaj traumave të thella me pasoja të përjetshme.
Ajo e cilësoi realitetin në terren si një “vrasje e përditshme e një klase të tërë fëmijësh”.
Pas kritikave për një sulm të 10 korrikut, në të cilin humbën jetën të paktën 10 fëmijë, autoritetet izraelite e konsideruan incidentin si një “gabim teknik”, duke deklaruar se objektivi i sulmit kishte qenë një anëtar i Xhihadit Islamik. Ngjarja është aktualisht nën hetim.
Në terren, situata humanitare po përkeqësohet nga dita në ditë. Sulmet e pandërprera dhe mungesa e ushqimit po rrisin në mënyrë dramatike numrin e viktimave mes civilëve.
Koordinatori i ndihmës humanitare të OKB-së, Tom Fletcher, paralajmëroi se njerëzit po qëllohen ndërsa përpiqen të sigurojnë ushqime bazë dhe i bëri thirrje Izraelit të rishikojë urgjentisht masat për mbrojtjen e civilëve.
