Kreu i qeverisë Edi Rama, duket se e ka paralajmëruar më herët arrestimin e Klement Balilit.
Para 3 muajsh, në një takim me strukturat drejtuese të Policisë së Shtetit, gjatë fjalës së tij për luftën kundër krimit, Rama kërkoi me çdo kusht arrestimin e Balilit, përpara se të vinte ambasadorja e re amerikane në Shqipëri.
“Dinjitet do të thotë që asnjë profil kriminal i kësaj republike të mos kthehet dot në legjendë urbane, as si gjobëvënës biznesesh, as si pushtues klubesh me bodyguard-ë të armatosur pa leje, dhe as si konsumator shampanjash të shtrenjta mes Bllokut.
Për shembull, unë nuk dua, i dashur drejtor i përgjithshëm i policisë së shtetit që të presim të vijë ambasadorja e re amerikane për të na kujtuar gjatë ndonjë fjalimi përshëndetës që Klement Balili nuk është kapur akoma.
Ashtu sikundër, nuk dua që të vazhdojnë të rrinë në detyrë, drejtorë dhe shefa komisariatesh, në zona apo në pika ku dinjiteti për të cilin fola vihet në diskutim, jo vetëm nga “të fortët” dhe nga makinat e tyre, por as nga kundërvajtësit që gërryejnë lumenjtë e male, që presin pemë, që ndërtojnë tek-tuk ende, por ndërtojnë, pa leje, që hedhin plehra dhe inerte, në vende të paautorizuar dhe me radhë.” – deklaroi Rama.
