Shqiptarët nuk janë një popull që konsumojnë shumë turizëm, kjo e krahasuar me vendet e rajonit por edhe të Europës. Madje një pjesë e mirë e tyre janë përqendruar në turizmin vendas gjatë dy viteve të fundit, ku edhe këtu ka pasur shkurtime të kohës së pushimeve.
E gjithë kjo pasqyrohet nga të dhënat më të fundit të INSTAT-it i cili në “Anketën e Turizmit Udhëtime dhe Pushime” për vitin 2019, tregoi se shqiptarët brenda vendit kryen udhëtime të shkurtra.
Por sipas të njejtës anketë, e kundërta ndodh kur shqiptarët dalin jashtë kufijve, ku në këto raste ata udhëtojnë dhe qëndrojnë më gjatë.
Udhëtimet e shkurtra (1-3 netë) në Shqipëri zënë një peshë më të madhe 68,8 %, gjatë 2019-ës, më shumë se sa udhëtimet e gjata (4+ netë).
Ndryshe paraqitet situata për udhëtimet e kryera jashtë Shqipërisë, ku peshën më të madhe të tyre e zënë udhëtimet e gjata me 71%.
Udhëtimet për “Pushime dhe kohë të lirë” me kohëzgjatje të gjatë në Shqipëri dhe jashtë saj, kanë një përqendrim më të lartë përkatësisht 56,2% dhe 52,8%.
Udhëtimet për “Vizita te të afërm dhe miq” kanë kohëzgjatje të shkurtër brenda vendit me 82,7% dhe kohëzgjatje të gjatë jashtë vendit me 84,2%.
Udhëtimet e kryera për qëllime biznesi, kanë kohëzgjatje të shkurtër në Shqipëri me 87% dhe të gjatë jashtë saj me 80,8 %.
Ajo që vihet re tek anketa, udhëtimet sipas gjinisë së udhëtarit, në vitin 2019, është se përqindjet më të larta të udhëtimeve brenda Shqipërisë janë kryer nga udhëtaret femra me 51,4%, ndërsa udhëtimet jashtë Shqipërisë janë kryer më shumë nga udhëtarët meshkuj 52,8%.
Lidhur me kohëzgjatjen e udhëtimeve të analizuar sipas grup-moshave të udhëtarëve, në vitin 2019, vihet re që udhëtimet me kohëzgjatje të shkurtër (1-3 netë) kanë shënuar përqindjen më të lartë për grup-moshën 45-54 vjeç.
Ndërsa udhëtimet me kohëzgjatje të gjatë (4+ netë) janë kryer nga grupmosha 65-74 vjeç.
/Burimi: INSTAT/ GazetaReforma.com/
