Pasi u zgjodh kryetare e Autoritetit të Mediave Audiovizive me 83 vota, Armela Krasniqi u lirua nga detyra si drejtuese e Agjencisë Telegrafike Shqiptare.
Në këtë detyrë ajo do të zëvendësohet nga Valbona Zhupa, vendim i cili është marrë nga mbledhja e Këshillit të Ministrave .
Vendimi i plotë:
Për lirimin dhe emërimin në detyre të Drejtorit të Përgjithshëm të Agjencisë Telegrafike shqiptare (ATSH) Në mbështetje të neneve 95, pika 2, dhe 100, të Kushtetutës, me propozimin e Kryeministrit, Këshilli i Ministrave
V E N D O S I:
1.Znj. Armela Krasniqi, drejtor i Përgjithshëm i Agjencisë Telegrafike Shqiptare (ATSH), lirohet nga kjo detyrë. 2.Znj. Valbona Zhupa emërohet drejtor i Përgjithshëm i Agjencisë Telegrafike Shqiptare (ATSH).
Ky vendim hyn në fuqi menjëherë.
Kujtojmë që zgjedhja e Armela Krasniqit në krye të AMA-s u shoqërua me debate të shumta. Partia Demokratike kishte deklaruar prej kohësh se Edi Rama po planifikonte të zgjidhte në krye të këtij institucioni, zëdhënësen e PS. Nga ana tjetër, delegacioni e BE dhe OSBE rekomanduan që zgjedhja e kreut të ri të AMA-s të bëhej me formimin e legjislaturës së re në stator. Ndërkohë, Krasniqi u votu në seancën e fundit të Kuvendit me 83 vota pro.
Ndërkohë, Valbona Zhupa në periudhën 2013 – 2016 ka qenë zv.drejtoreshë dhe drejtoreshë e Informacionit pranë Agjencisë Telegrafike Shqiptare.
