Pas ngjarjes së sotme në “Don Bosko” kanë dalë detaje të reja në dritë. Mësohet se viktima i identifikuar si Erion Çela rezulton të jetë pronar i një tabakinoje. 35-vjeçari i ndjerë i cili mbeti i vdekur në vend pas atentatit të sotëm në kryeqytet, priste të bëhej baba i një vajze.
Ndërkohë nga breshëria e plumbave që u gjuajtën drejt lokalit në zonën “Fantino” u plagosën edhe vëllai i viktimës Blerim Çela, 28 vjeç, si dhe daja, Edmond Crroj, 41 vjeç.
Autori ende i paidentifikuar ka plagosur edhe Arben Danin, 46 vjeç dhe kamarierin e lokalit Azbi Selimaj, 19 vjeç, të cilët u dërguan në Spitalin e Traumës. Autorët, menjëherë pas sulmit, janë larguar me shpejtësi drejt Laprakës.
Njoftimi i Plotë:
Tiranë/Informacion paraprak
Më datë 04.01.2022, rreth orës 16:15, në “Don Bosko”, në ambientet e një lokali dyshohet se është qëlluar me armë zjarri nga jashtë, në drejtim të një tavoline ku ishin ulur pesë shtetas.
Si pasojë e të shtënave, shtetasi E. Ç., 35 vjeç ka humbur jetën, dhe janë plagosur shtetasit A. D., 46 vjeç, A. S., 19 vjeç, B. Ç., 28 vjeç dhe E. C., 41 vjeç.
Shërbimet e Policisë kanë ngritur pika kontrolli në të gjitha pikat hyrëse-dalëse të Tiranës dhe në brendësi të lagjeve ku dyshohet se janë larguar personat, të cilët pasi kanë qëlluar me armë zjarri, janë larguar me një automjet tip “Mercedes-Benz”.
Grupi hetimor ndodhet në vendngjarje dhe po punon për sqarimin e rrethanave të ngjarjes.
